ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့၊ တာငါးဆယ်တောင်ရပ်ကွက်၊ ကရင်ကျောင်းလမ်းရှိ၊ ကွန်ပျူတာတက္ကသိုလ်(ဟင်္သာတ)၊ ဘွဲ့နှင်းသဘင်ခန်းမ၌ ၂၀၂၆ ခုနှစ်၊ စက်တင်ဘာလ ၁၁ ရက်၊ နံနက်ပိုင်းနှင့် မွန်းလွဲပိုင်းတို့တွင် ICT Project ပြိုင်ပွဲ၊ ပြပွဲနှင့် စာတမ်းဖတ်ပွဲ အခမ်းအနား ပြုလုပ်သည်။
အခမ်းအနားသို့ ကွန်ပျူတာတက္ကသိုလ်(ဟင်္သာတ)မှ ဒုတိယပါမောက္ခချုပ်၊ ဒေါက်တာထွန်းမြတ်အောင်နှင့် ပါမောက္ခ/ ဌာနမှူး၊ ဆရာ၊ ဆရာမများ၊ ကျောင်းသား၊ ကျောင်းသူများ၊ ဟင်္သာတမြို့၊ ဓမ္မဗိမာန်ကျောင်းတိုက် ဆရာတော် အရှင်ဉာဏာလင်္ကာရနှင့် ဖိတ်ကြားထားသည့်ဧည့်သည်တော်များ၊ ဌာနဆိုင်ရာအကြီးအကဲများနှင့် တာဝန်ရှိသူများ တက်ရောက်ခဲ့ကြပါသည်။
အခမ်းအနား၌ ဒုတိယပါမောက္ခချုပ်၊ ဒေါက်တာထွန်းမြတ်အောင်က အဖွင့်အမှာစကားပြောကြားရာတွင် ICT Project ပြိုင်ပွဲ၊ ပြပွဲနှင့် စာတမ်းဖတ်ပွဲ အခမ်းအနားကျင်းပရခြင်းမှာ ကျောင်းသား၊ ကျောင်းသူများ၏ နည်းပညာဆိုင်ရာ တီထွင်ဖန်တီးနိုင်မှုစွမ်းအားကို မြှင့်တင်ပေးရန်၊ လက်တွေ့အသုံးချ သုတေသနလုပ်ငန်းများကို စိတ်ပါဝင်စားလာစေရန်နှင့် မိမိတို့၏လေ့လာတွေ့ရှိချက်များကို ရဲဝံ့စွာတင်ပြဆွေးနွေးနိုင်စေရန်ရည်ရွယ်၍ ကျင်းပခြင်းဖြစ်ကြောင်း ပြောကြားခဲ့ပါသည်။
ယင်းနောက် ကျောင်းသား၊ ကျောင်းသူများမှ တက္ကသိုလ်ဂုဏ်ပြုသီချင်းဖြင့် ဖျော်ဖြေဧည့်ခံပြီးနောက် ဒုတိယပါမောက္ခချုပ်၊ ဒေါက်တာထွန်းမြတ်အောင်က ၂၀၂၅-၂၀၂၆ ပညာသင်နှစ်၊ ဘွဲ့ကြိုမောင်မယ်များ၏ ဆုရ Project စာတမ်းများကို ကြေညာပေးကာ ဆုရ Project စာတမ်းများကို သက်ဆိုင်ရာ ကျောင်းသား၊ ကျောင်းသူ များက PowerPoint များ၊ လက်တွေ့လုပ်ဆောင်ထားသည့် Project များဖြင့် စာတမ်းဖတ်ရှင်းလင်း သရုပ်ပြခဲ့ ကြပါသည်။
ယင်းနောက် Alumni Network ခေါင်းစဉ်ဖြင့် ပထမဆုရရှိသည့် Supervisor ဒေါက်တာနှင်းချယ်ရီနှင့် မချစ်စုဝေ၊ မောင်အောင်ပြည့်စုံတို့အဖွဲ့အားလည်းကောင်း၊ IoT-Based Smart Piggery System ခေါင်းစဉ်ဖြင့် ဒုတိယဆုရရှိသည့် Supervisor ဒေါ်စိုးစိုးမွန်နှင့် မောင်မျိုးကိုသက်၊ မောင်အောင်ပြည့်ဖြိုးတို့အဖွဲ့အား လည်းကောင်း၊ Digital Catalogue System for UCSH Library ခေါင်းစဉ်ဖြင့် တတိယဆုရရှိသည့် Supervisor ဒေါ်ခင်စမ်းဝေနှင့် မရွှေရည်ရွှန်းလဲ့၊ မောင်ရန်နိုင်စိုးတို့အဖွဲ့အားလည်းကောင်း၊ Iot-Based Environmental Monitoring and Early Warning System for Residential Safety ခေါင်းစဉ်ဖြင့် အမှတ်တူ၍ တတိယဆု ထပ်မံရရှိခဲ့သည့် Supervisor ဒေါ်ငြိမ်းငြိမ်းအိနှင့် မနှင်းစုလှိုင်၊ မသဲဦးဆုပြည့်စုံတို့အဖွဲ့အားလည်းကောင်း၊ Student Feedback Information System ခေါင်းစဉ်ဖြင့် စတုတ္ထဆုရရှိသည့် Supervisor ဒေါက်တာနှင်းချယ်ရီနှင့် မဟေမာန်ခက်ဝေ၊ မောင်မင်းဇေယျာအောင်တို့အဖွဲ့အားလည်းကောင်း၊ IoT Smart Campus: Smart Gate Security and Classroom Management System ခေါင်းစဉ်ဖြင့် ပဉ္စမဆုရရှိသည့် Supervisor ဒေါ်သီတာစိုးနှင့် မောင်နိုင်းအောင်ခန့်၊ မအိမ့်ပိုပိုချစ်တို့အဖွဲ့အားလည်းကောင်း နံနက်ပိုင်းတွင် တာဝန်ရှိသူအသီးသီးက ဆုများ အသီးသီးချီးမြှင့်ခဲ့ကြပါသည်။
အခမ်းအနားဒုတိယပိုင်းအား ပြန်လည်စတင်ခဲ့ရာ နှစ်သိမ့်ဆုများရရှိခဲ့သော အဖွဲ့(၁၁)ဖွဲ့ကလည်း ၎င်းတို့ ပြုလုပ်ထားသော Project စာတမ်းများကို သက်ဆိုင်ရာ ကျောင်းသား၊ ကျောင်းသူများက PowerPoint များ၊ လက်တွေ့လုပ်ဆောင်ထားသည့် Project များဖြင့် စာတမ်းဖတ်ရှင်းလင်းသရုပ်ပြခဲ့ကြပြီး၊ တာဝန်ရှိသူအသီးသီးက နှစ်သိမ့်ဆုရရှိသော ၎င်းတို့အဖွဲ့အသီးသီးအား ဆုများအသီးသီး ပေးအပ်ချီးမြှင့်ခဲ့ကြပါသည်။
ညနေပိုင်းအခမ်းအနားအစီအစဉ်တွင် အ.ထ.က(၁)၊ အ.ထ.က(၂)၊ အ.ထ.က(၃)၊ အ.ထ.က(၄)၊ အ.ထ.က (၅)နှင့် အ.ထ.က(၆)တို့မှ အထက်တန်းကျောင်းသား၊ ကျောင်းသူများက လာရောက်လေ့လာကြပြီး၊ ဘွဲ့ကြို မောင်မယ်များက ၎င်းတို့၏ Project များကို ရှင်းလင်းသရုပ်ပြခဲ့ကြပါသည်။ အခမ်းအနားကို ကွန်ပျူတာ တက္ကသိုလ်(ဟင်္သာတ)မှ ကျောင်းသား၊ ကျောင်းသူများက ဇာတိမာန်သီချင်းဖြင့် ဧည့်ခံဖျော်ဖြေကြပြီး၊ အခမ်း အနားကို ညနေ(၄း၃၀)နာရီတွင် အောင်မြင်စွာရုတ်သိမ်းခဲ့ပါသည်။
အဆိုပါအခမ်းအနားသို့ ဌာနဆိုင်ရာအကြီးအကဲများ၊ ဧည့်သည်တော်များ၊ ကျောင်းသား၊ ကျောင်းသူများ၊ စုစုပေါင်းအင်အား(၈၅၀)ခန့် တက်ရောက်ခဲ့ကြပါသည်။
